Në një vend, institucionet e të cilit marrin veset e shefit të radhës, njerëzit janë të prirur të mos i besojnë deklaratave zyrtare, me idenë fikse se as vetë shteti nuk i beson ato çka thotë. Kështu ka ndodhur me shifrat për rritjen ekonomike të vendit, kështu ka ndodhur me raportet për përmirësimin e klimës për biznesin, e kësisoj, nuk ka pse të mos ndodhë kështu edhe me turizmin, sikurse kështu mund të ndodhë edhe me regjsitrimin e minoritetit grek në Fushë-Arrëz. Megjithatë, duke qenë medium, një revistë nuk mund t’i përkasë njërës palë. Pra shtetit që shkarkon bateritë në fushata propagandistike trushpëlarëse. E as turmës së madhe të nihilistëve, mosbesueve e indiferentëve që shtohen ora-orës. Në një moment të tillë krize, një medium ka mundësinë e madhe të pozicionohet mes palëve, në përpjekje për t’u kthyer atyre besimin te njëri-tjetri, duke u bërë në vetvete një faktor i rëndësishëm i zhvillimit, si dhe një shembull i respektueshëm i transparencës profesionale që do të duhej të ishte kudo.
Një detyrë të tillë ka marrë përsipër të kryejë këtë numër revista Travel, nëpërmjet angazhimit voluminoz e të mundimshëm për me thirrë në forum zërin e vërtetë të turizmit në Shqipëri: biznesin akomodues, i cili është ai që përballet drejtpërdrejt me turistët, ai që nuk pret t’ia thotë kush numrin e personave që kanë hyrë në këtë apo atë pikë të kalimit kufitar, numrin e pushueve ditorë apo të turistëve të huaj. Kanë marrë pjesë në këtë forum jo pak, por rreth 1.5 përqind e biznesit hotelier në Shqipëri, shifër kjo shumë herë më e madhe se ajo që njihet nga praktikat e sondazheve, kampionet e të cilave nuk e kalojnë 0.03 përqindshin e numrit të përgjithshëm të target grupit.
Nëpërmjet këtij forumi revista nuk merr përsipër të nxjerrë përfundime mbi gjendjen reale të turizmit në Shqipëri, tani që sezoni është në finalen e vet, duke ia lënë këtë ekskluzivitet lexuesit mendjehapur, i cili e ka mundësinë të krahasojë brenda së njëjtës revistë statistikat zyrtare mbi numrin e hyrje-daljeve të njerëzve e mjeteve në Shqipëri, me zërin e operatorëve turistikë që i janë përgjigjur në mënyrë të drejtpërdrejtë pyetjeve mbi ecurinë e biznesit të tyre në këtë sezon turistik. Me një shpërndarje gjeografike që e rrok krejt Shqipërinë turistike nga Valbona në Ksamil, nga Durrësi në Pogradec, nga Thethi në Voskopojë e Leskovik, nga Kavaja në Vlorë e nga Lura në Sarandë, duke kaluar edhe mespërmes Beratit e Gjirokastrës, biznesi hotelier është i pranishëm në këtë numër të revistës Travel me përvojat e këndvështrimet e larmishme për bukën e vet të përditshme. E meqë erdhëm në këtë pikë, është koha që institucionet ta shkëmbejnë në lekë rritjen e madhe të numrit të turistëve që deklarojnë se kanë hyrë në Shqipëri gjatë këtij sezoni, sepse ata që hanë bukë me këtë punë, nuk mendojnë aspak kështu.
