Kur udhëton nëpër Shqipëri, zakonisht pret të shijosh rakinë e fshatit, verën e kantinave të vogla apo konjakun e trashëguar nga brezi në brez. Por diku në zemër të një kantine moderne shqiptare, ka lindur një tjetër pije që po i habit edhe njohësit më të përkushtuar të shijeve: whisky shqiptar. Një histori pasioni, guximi dhe mjeshtërie që filloi me një ëndërr – dhe sot derdhet në gotat më kërkuese të Europës.
Në një kulturë ku rakia dhe konjaku kanë qenë për dekada simboli i prodhimeve tradicionale, krijimi i një “whisky” shqiptar tingëllon si një dalje nga shinat e traditës dhe gjithashtu një ëndërr e largët. Por aty ku shumica shihnin të pamundurën, Aquila Liquori pa një sfidë për t’u përqafuar. E themeluar më 1992, dhe me ekspertizë disavjeçare në prodhimin e pijeve alkolike, Distileria Aquila Liquori, ndërtoi në zemër të Tiranës stabilimentin e fermetimit dhe distilimit të whisky-t.
Pas shumë eksperimentimesh dhe përpjekjesh, në vitin 2005 doli shishja e parë e Whisky. E vlerësuar fillimisht nga miq dhe familjarë, kjo provë e parë u kthye në shtysë për të nisur një rrugëtim të gjatë e të pazakontë për një kompani shqiptare.
Gjatë pesë viteve të para, përmes një përzgjedhjeje të kujdesshme të përbërësve, maltit dhe drithërave nga krahinat e ndryshme të Shqipërisë, Aquila Liquori arriti të përpunojë një produkt që jo vetëm u prit mirë në tregun vendas, por shpejt fitoi vëmendje edhe jashtë kufijve. Kjo arritje e klasifikoi kompaninë mes eksportuesve kryesorë të whisky-t në rajon.
Sot, me një kapacitet prodhimi mbi 2 milionë litra dhe një prani të qëndrueshme në tregjet europiane, Aquila Liquori ka konsoliduar pozicionin e saj si lider në prodhimin e whisky-t në rajon. Por për të marrë jetë të plotë, ky projekt kishte nevojë për një identitet të veçantë, një karakter që mishëronte shpirtin e tij. Dhe kështu lindi Glauk Blended Whisky, frymëzuar nga figura autentike dhe e patjetërsueshme e mbretit ilir Glauk.
Me një shije klasike që i reziston kohës, Glauk Blended Whisky u mirëprit gjerësisht, duke hapur rrugën për një tjetër sukses: Glauk Single Malt.
Ky produkt i ri, i lançuar nën markën Made in Albania, theu edhe më tej tabutë, duke vendosur Shqipërinë në hartën e prodhuesve seriozë të whisky-t përkrah emrave të mëdhenj nga Skocia, Anglia, Japonia apo SHBA.
Glauk Single Malt prodhohet me përpikëri të jashtëzakonshme, sipas metodave tradicionale të tymosjes së maltit para fermentimit. Rezultati është një whisky me aromë të thellë druri, të balancuar nga nuanca të frutave të thata, i vjetëruar për 8 vjet në fuçi amerikane të vogla, prej 180 litrash.
Ky proces kërkon mjeshtëri dhe durim. Vetëm 100 fuçi përzgjidhen çdo vit nga mijëra të tilla, falë një ekipi me mbi 30 vjet përvojë në përpunimin e whisky-t. Kjo përzgjedhje e hollësishme garanton një spektër të pasur shijesh dhe aromash që e bëjnë Glauk Single Malt një përvojë unike për njohësit e vërtetë.
Nga një ide e guximshme në një treg të dominuar nga tradita, te një emër që përfaqëson me krenari Shqipërinë në botën e whisky-t, Glauk është më shumë se një pije – është një histori suksesi, identiteti dhe pasioni të distiluar me kujdes në çdo pikë.
Superstrada Tiranë-Durrës, km. 4
Tirana-Albania
